ئازادیی رادەربڕین و رۆژنامەگەری
ئازادیی رادەربڕین بناغەی هەموو ئازادییەکانی ترە. قوباد تاڵەبانی پێیوایە ئەگەر رۆژێک خەڵک نەوێرن لە ترسی دەسەڵات ئازادانە ڕا و بۆچوونی خۆیان دەرببڕن، ئیتر ئەو دەسەڵاتە شەرعییەتی نەماوە، پێشیوایە حکومڕانییەکی باش ئەو حکومڕانییەیە کە دەسەڵاتدار لە خەڵک بترسێت و نەوێرێت هەنگاوێک پێچەوانەی ئیرادە و خواستی کۆمەڵگا بنێت.
بەهێزکردنی پێگەی ژنان و گەنجان
پێگەی ژنان و گەنجان لەهەر کۆمەڵگایەکدا پێوەرێکی گرنگە بۆ دیاریکردنی ئاستی گەشەسەندوویی و دۆخی ئازادی و هیوا بە ژیان لەو کۆمەڵگایەدا. هەربۆیە قوباد تاڵەبانی چ لە حکومەت و حیزبدا و چ وەک چالاکوانێک؛ بەهێزکردنی پێگەی ژنان و گەنجانی وەک ئەولەوییەتی کاری سیاسیی خۆی پێناسە دەکات.
حکومڕانیی دروست
قوباد تاڵەبانی حکومڕانیی دروست لە یەک وشەدا بە حکومڕانییەکی بەرپرسیار پێناسە دەکات؛ بەرپرسیار بەرامبەر بە ئێستا و داهاتووی کۆمەڵگا. بەرپرسیارە بەرامبەر بە ئێستای کۆمەڵگا بەو واتایەی دەسەڵاتی سیاسی دەبێت ویست و داواکارییە سەرەکییەکانی مرۆڤ وەک ئاسایش، پاراستنی کەرامەت و ئازادییەکان و خۆشگوزەرانی بۆ هاووڵاتییان دابین بکات.
